台中清泉崗機場(RMQ)位於台中沙鹿區，係台灣中部唯一的聯外機場，近年因為HK Express開設香港來往台中的航線，令到台中機場成為香港人去台灣會飛往嘅機場之一，經呢個機場除了去台中外，仲可以去到唔少位於台灣中南部的景點，例如南投清境、合歡山、日月潭、集集、阿里山等。各位網友應該唔會未飛過去呢個機場吧，但小編相信各位網友都會覺得呢個機場嘅對外交通真係好唔方便，有啲網友甚至問過小編：可唔可以出返台中火車站/台中高鐵站唔坐的士？因此小編匯集從台中機場前往大家主要會去嘅地方嘅搭車方法，讓你沒有難度的去發掘台灣中南部的自然美麗！
(1) 台中機場乘車位置
台中機場搭車其實唔太難，當你拎晒行李、喺台灣銀行撳晒錢/唱晒錢(你可能喺禁區部ATM撳左都唔定LOL)，同埋喺中華電信Counter申請埋電話卡後，如果你要搭公車或者的士，就喺中華電信斜對面嘅扶手電梯落一層去B1/F，你會先看到的士站，再行前少少就有一個候車室，候車室前面就係公車站了，大家自己睇返各候車月台嘅路線表，揀返啱路線上車就可以了(提多句，台中搭公車用悠遊卡都無問題了)。但如果你係訂左包車或者共乘車上清境，通常司機會喺中華電信出面個上落客區等大家。
(2) 你要去哪裡？
(A) 台中火車站/臺鐵台中站
坐中台灣客運公車302路(台中航空站<->台中公園)，可以唔駛轉車直達台中火車站，班次唔算密但旨在方便到台中火車站，全程約需60-65分鐘，至少公車會平過搭的士出市區先(刷悠遊卡NT$30)；但千祈唔好上同樣去到台中火車站的公車9路，要坐好耐的。
亦可以先搭的士到臺鐵清水或者沙鹿站，然後搭臺鐵到臺中火車站，但清水/沙鹿往台中的臺鐵不但係站站停的區間車，而且班次唔係多，時間同搭302路公車差唔多，所以大家可以衡量一下。價錢方面大概是NT$200-220。
如果搭的士去台中火車站的話，最快係行中清路、五權路同台灣大道一段前往，價錢Around NT$450-500。
(B) 高鐵台中站
坐台中客運高鐵快捷公車156路可以直達高鐵台中站/臺鐵新烏日站，但班次比起去台中火車站的302路為疏，走左一班車可能要等個幾兩個鐘先有下班車，但勝在係往來高鐵站最平的方法(刷悠遊卡NT$29)，所以大家可以諗諗。
亦可以考慮搭台灣好行日月潭線前往高鐵台中站，但每日只有15:20一班車，票價NT$50。
同時，你都可以先搭的士到臺鐵清水或者沙鹿站，然後搭臺鐵到新烏日站轉高鐵，但都係嗰個問題：區間車行走＋班次唔多。
如果搭的士去高鐵台中站的話，最快係行國道3號去，價錢大約NT$750-800。
(C) 日月潭/清境/埔里
上日月潭的話，台灣好行日月潭線每日15:20有一班車從台中機場開往日月潭(水社)，而其餘時間要坐巴士到日月潭，就要先坐去台中高鐵站再搭車(台灣好行/南投客運)上。價錢方面，台中機場單程往日月潭為NT$240，台中火車站/台中高鐵站單程往日月潭要NT$190。
去埔里的話，都係要先搭去台中火車站/台中高鐵站再轉台灣好行/南投客運埔里、日月潭線上；而去清境更加要喺埔里轉多程車上，而且埔里往來清境的班次本身唔算多。
因此各位網友可以考慮一下包車或者搭共乘車去南投嘅主要景點(特別如果你要上清境，係最好包車/共乘車上)，價錢由NT$500-2500不等，小編會喺下面Useful Link一欄提供少少連結大家參考一下。
(D) 一中/逢甲/高美濕地
一中街直接去的話只有繞路的公車9路可以去到，或者搭公車302路到台中公園落車行過去，所以小編會建議大家坐的士去(Around NT$400-450)。
至於逢甲都係最好搭的士去，因為公車都要轉一次車先去到。
去高美濕地的話，一係你先搭的士到清水火車站，然後轉公車178路同179路去，但要留意返班次；一係就直接從機場搭的士去。但無論你揀咩方法，請最好搵個地方安置你啲行李先(台中機場有Locker放到行李的)。
小結：
始終小編唔能夠陳列從機場去所有景點的方法，因此如果各位網友有啲地方唔知點去，可以Inbox我地 台灣.日和，希望呢篇可以幫到大家玩盡台灣中南部！
Useful Link：
台中市公車302路：http://www.traffic.taichung.gov.tw/form/index-1.asp?Parser=3,7,161,52,,,1818,212
台中市公車156路：http://www.tcbus.com.tw/image/lineimage.php?imagetest=156
台中市公車178路：http://www.traffic.taichung.gov.tw/form/index-1.asp?Parser=3,7,161,52,,,2052,19,,,,,178
台中市公車179路：http://www.traffic.taichung.gov.tw/form/index-1.asp?Parser=3,7,161,52,,,897,19,,,,,179
臺鐵時刻查詢：https://www.railway.gov.tw/tra-tip-web/tip/tip001/tip112/gobytime
台灣好行日月潭線：http://www.ntbus.com.tw/tour-sml.html
南投客運埔里、日月潭線：http://www.ntbus.com.tw/hsr6.html
清境無縫接駁：http://www.ntbus.com.tw/cjfm.html
季宏旅遊－清境共乘：https://www.taiwantravelbus.com
OKBUS清境觀光巴士：http://www.cingjingbus.tw/
台灣小客車租賃：台灣小客車租賃有限公司Theresa觀光小巴服務區
網友投稿：筆名/博客名稱：台灣.日和
博客鏈結：https://www.facebook.com/taiwan.sunlight/
E-mail：taiwan.sunlight@gmail.com