題外話: 由於一上機前已經開始咳到半死 再加上夜晚一落機即刻去Night Market食Phai Thai同勁spicy既炒豬肉 第二朝就O-M-G! 把聲沙到變o靚坤..
因為有買旅遊保險 所以即刻上網搵左間離Hostel好近 又被網友喻為「泰國版養和」既ChiangMai Ram Hospital去睇醫生!
入到去只要同企係門口既姐姐講想睇醫生 就會有專人帶你去登記。
(請無視我把和旱草頭髮…)
臨見醫生前 護士好貼心問我使唔使要翻譯 咁我唔使就去左見靚靚女醫生嚕!泰國醫生係問得好詳細 甚至佢開完藥 會解釋埋隻藥點用、有咩療效。 相比香港醫生零眼神接觸 問多兩句都唔願答既mode泰國醫生態度係非!常!好!的!
終於到左全個trip最期待既一日去elephant park
眾所周知 去泰國騎大笨象、睇大笨象表演畫畫好似一個必做既活動
奈何 又有幾多個人知道 觀嘗個十幾分鐘既背後 其實係件好殘忍既事
大象始終有獸性 有象伕為左圖利同令大象變得溫馴 會將象眼插盲 大象失去視力自然會乖乖就範
懷孕象媽媽要咩上鐵籃或者竹籃 每日被人類騎上去來回行無數次
(將心比己 陀住個b之餘再要你咩多個上身 一日行8個中 淨係比粥水你食 無錢入你袋 會有咩感覺?)
象牙都係 到依刻都唔明象牙擺設有咩咁靚!
佢地係要比人射殺 再粗暴地拎走一對象牙 象牙原有既位得返兩個窿 而象就咁等死!
當然世上總有1,2條仆＿會話 象無象牙都唔會死 有咩所謂!
有依種想法既人我真係要hi你auntie祖宗18代 的確 象無象牙唔會死
但象有70-80年壽命 有d重耐 簡單d講 圖利班人死晒隻象都可能未死 咁有咩方法可以快靚正咁拎象牙？
咪一係直接射死佢 一係直接成條象鼻切左佢再棄屍囉!
(將心比己again! 比人一野切左你個鼻落黎都會痛 其實動物都會架囉唔該!)
any肥 2016最高興既係聽到政府建議五年內全面實施禁止本地象牙貿易 希望係真!
好 返正題 一講依d話題就太激動
係plan行程時 占少講過想騎大象 我當然say no!
因為覺得 點解要將自己既快樂建築係大象身上 所以就開始爬文
搵到幾間聲稱係以保護大象為原則但又有得騎下既公園 trip advisor睇清楚每間去過既人既comment
最後就選擇左Baan Chang Elephant Park
我地選擇左One day Elephant Mahout Training (TBH 5,800/2人價錢+1隻象)
當日朝早發生左小插曲 因為自己大意講錯第二間酒店名比園方知 令所有人都等左半個中先可以去象園
Elephant Park離hostel大概一個半小時車程
到園之後 會有mahout(象伕)帶我地去locker放低貴重品物同比衫我地換
當大家換好之後 就會同我地講解下泰國大象既特色、起居飲食同生活
之後就帶我地去拎香蕉同甜蔗去餵大笨象!!!!
Mahout會教我地點樣拎香蕉同蔗 大象會好快就用象鼻捲住香蕉同蔗放入口
個種好奇妙 好開心既感覺 唔識用文字去形容 城市大既我 邊會諗到可以親手餵象呢
對手忙住餵象又污穢 所以影得唔係太多相
有3個mahout見到我地有部即影即有好神奇 所以我地叫佢3個同大象影張送左比佢地
睇得出佢地見到影像慢慢浮出黎個樣係好滿足!
餵完之後就坐低學下點樣控制大象既指令 有團友問mahout點解佢地要拎鐵鈎同要用鐵鏈鎖住佢地隻腳
Mahout解釋因為大象始終係動物會有out of control既時候 而且有好幾千kg 拎鐵鈎係為左保護mahout自身安全
非要傷害佢地 因為大象本身已經受夠苦先會到依個象園
而鐵鏈鎖住佢地隻腳 只為左佢地唔好亂走同防止佢地打交 定時定候會有mahout帶佢地周圍散步
講解完 騎大象! 當然係最原始方法 直接騎上去! 無任何令大象唔舒服既鐵籃或者竹籃
我本身就畏高 企係隻比較細既象隔離都唔覺高 一上到去大象企起身，大獲! 驚到唔敢郁..
佢一步一步行既時候 得條麻繩可以扯實 好有一種就fing我落地既感覺
而mahout亦唔會lead住佢行 靠用指令去引導佢 但老實講 係過癮架!
兜完一圈試坐完就食lunch休息下 有cute豬貓貓玩 休息過後
又係騎大象既時間!
不過今次係兩個人一齊騎一隻更大既大象…重要上山上斜兜住象園行一圈!
去程我坐象頭 占少不斷叫我擰轉影相 我已經淆底到唔敢郁 重叫我擰轉係咪short架!
大象行行下會自己偏離行路去搵野食 又會突然停低唔郁.. 好搞笑
行到去一個水池位 全日重頭戲 – 幫大象洗白白!
一人一個小水筒同刷地板既刷 大象會自動波行落水 (老實講 水係污穢到一個點 重要赤腳落水 係有點兒核突架!)
而我地既任務 就係要用刷去刷大象身上既泥沙 再用水沖走佢
好好玩呀 大象會突然變吸水大笨象咁噴水 沖沖下又會有幾舊草球既野浮上水 無錯 係象屎
最後 我地個mahout重一手扯左我上象背叫我企係度影相 正當我驚佢會企起身之際 佢真係企左起身行返上水
(我搵唔返張相呀!!!! Mahout有幫我影架!!! 好sad!!!)
上返水同佢地selfie一輪就原路返象園沖涼洗頭換衫嚕!
佢係我隻5歲象bb呀:D
依隻象就係比d仆＿鋸左忽象牙.\ /.”
隨住one day mahout training完結之後梗係去spaaaaa
之後就去左The Good View Bar & Restaurant
美中不足係個晚落左少少雨 無得坐出走
不過野食同飲品都okay架! 食完再戰night market
聽日去好靚既Wat Phra That Doi Suthep同白雪雪既Wat Suan Dok!
Remarks:-
即使兩年後既今日再回味 我都想再去多一次! 因為依種體驗係讀幾多書都感受唔到架
請好好保護大象 佢地好可愛架! 唔好再虐待佢地!
除左大象 重有鯊魚 2017 我應承過自己唔好再食翅 因為我重想有機會睇到佢地!
上文提到上機時已經咳到半死 再經過噚晚唔識死 食左先算既心態食辣野 飲cocktail 到朝早起身結果就係失聲!
咋咋臨起身去左hostel附近既醫院搵醫生睇(依度唔多講 遲下睇題外話篇)
睇完就搭左車諗住好快返hostel附近搵野食醫肚 點知 上錯雙條車 明明5分鐘車程 變左圍住個gate兜左一大個圈
不過旅行就係咁 錯有錯著先可以欣賞到多d風景!
最後花左近半個中先返到去 求其搵間嗌左pad thai同咖哩雞肉湯麵加椰青就返hostel邊晒太陽邊食外賣喇!!
唔好睇間hostel個feel有d舊 原來個泳池都唔錯架! (不過唔會明點解熱到咁，但池水可以凍到起雞皮!)
我晒左一陣就返上房get ready去遊寺廟
一出hostel就見到有可愛貓咪
第一站: Wat Lam Chang
hostel職員提議我地可以去參觀下 係hostel同一條街既街尾
雖然寺廟細細兼無人 但我都好守規矩 圍返條沙龍先入去架
第二站: Wat Chiang Man
只係離Wat Lam Chang兩分鐘距離 但因為地圖唔係太detail加上門牌有點兒細 所以左兜右兜先到
(其實當大家見到Glasshouse Restaurant再向前行就係)
依間係Chiangmai第一間廟 好值得去參觀
相比Wat Lam Chang佢係幾大下同都係遊客區area，所以係超~級~多大陸遊客!
由於我地都唔係有信神佛既人 所以我地都無深究過寺廟背後既歷史 只係用觀賞同遊客既角度去參觀同欣賞
全寺廟我係最欣賞既係坐立係廟外既金塔 金塔下係有十五隻大象圍住
細心留意會發現每隻象鼻上面都有幾條短竹定甘庶(?!) 唔知有d咩特別既意思呢?
由Wat Chiang Man行去Wat Chedi Luang途中 會經過一間叫Hot Chili既餐廳
聽聞有唔少經典既泰菜食 不過我就無入去食喇! 只係被外面既燈籠吸引住姐
第三站: Wat Chedi Luang
依站係今日最期待既一站!佢古舊既外型完全吸引住我!
(基本上圖中既tuktuk都係大陸人搭)
但媽呀! 一車車大陸人咁黎 我係咪返左大陸呀?
無論正面、左面、右面定後面影 都有不一樣既感覺同畫面
(睇完Wat Chedi Luang個刻 好想即刻到10月去睇Angkor Wat!!!)
因為行梯爛到行唔到所以封左嚕!
我地參觀時已經差不多日落黃昏，亦撞正一班小和尚應該等..食晚飯?
占少見狀 即刻用相機同佢地黎個#selfie 而我亦都攝左埋去影
影完佢地個又開心又尷尬既樣話比我知 好似真係未同過女仔影相咁 成班都好得意
不過影完我先諗 其實佢地可唔可以同女仔影相架呢? 咁樣算唔算破戒架?
(不知者不罪呀..)
臨走敲下個鐘 保佑自己身體健康:)
一出廟就見到我好中意既雞旦花樹
係站與站之間，其實都入過唔少既寺廟度睇
但大部份可能都係比較細規模既寺廟 門牌只得泰文字 無英文 所以我都分唔清邊間打邊間
隨住日落 今日既遊泰廟都完結嚕
由於全日都係行行行同行 對腳好似就快斷咁 所以就係古城夜市附近求其搵左間做foot massage
隔離個個明顯唔受力 佢嗌到鬼晒咁嘈 連按摩姐姐都忍唔住笑佢!
去古城夜市 見到最多唔係泰國人 而係香港人同大陸人!
左邊一句中文 右邊一句普通話 一d都唔似去左泰國 我地掃左豬腳飯、banana roti、串燒就開始行夜市嚕
夜市可以話係長過彌敦道，但其實賣既野來來去去都差唔多，有袋、工藝品、飾物、銀器、香油肥皂…
不過我並唔熱衷購物 都係齋睇多過買野 只係買左一個布袋同一個沖涼絲瓜絡 夾埋都係十蚊港紙!
(同款布袋係香港係賣緊三十港紙起架 淘寶都要RMB20依度TBH20!)
好普通既banana roti
好好味豬腳飯 但油左ddddddd咁囉 (不過聽聞依間豬腳飯係出名架! 值得一試!)
途中經過一個檔口賣緊一種叫Thai Herb小食 用香葉包住花生碎、青檸、蒜頭等等既香料
唔知咩黎架 不過企係度望時見到唔少泰國人去買 咁就膽粗粗試下喇!
(最弱智係買完住要問老闆係咪就咁塞入口食-_-“)
出奇地好味，食完好有回甘既味道 我估都係當地人先會食既小食黎掛?
臨走等tuktuk時 咁岩見到對面街有兩個亞叔擰晒patpat咁係度唱歌 望多兩望 POLICE STATION!
無錯 無望錯 係警局外台上唱緊歌個兩位亞叔係警察黎架!
搭返架MK tuktuk返hostel 第二日又完!
清邁基本資料:
位於泰北既清邁 小妹對佢既認識係無
(我係可以以為清邁同清萊係同一個area..)
選擇清邁去旅行 全因未去過同想去 最重要平呀嘛
所以係公司問過幾位同事 而佢地既comments都係
1. 悶到飛起
2. 行完2間廟你已經唔想行
3. 無野做 hea爆
聽完 個心真係有d離一離 唔係呀嘛 我重要去5D4N添架 點算好!
因為怕悶怕晒左個假 就造就左我日日PLAN行程搵地方去
(其實 各方朋友都比左唔少提議 但小妹又畏高又唔嚇得 所有笨豬跳/激流/JUNGLE FLY一律唔岩玩 亦都因為唔想占少咩都就晒我 所以提議過不如搵日各有各玩 點知佢話你PLAN喇就你得架喇)
最後就係咁意PLAN左以下行程:
27/3/2015 (DAY1): HK>CNX (HKEXPRESS)>HOSTEL (BB Mantra Hostel)>Saturday Walking Street夜市搵食
28/3/2015 (DAY2): 寺廟一天遊>夜市搵食
29/3/2015 (DAY3): BAAN CHANG ELEPHANT PARK>SPA>The Good View Bar & Restaurant> Sunday Market
30/3/2015 (DAY4):搬Hostel (Le Canal Boutique House)> Wat Phra That Doi Suthep>Wat Suan Dok>Mix Restaurant and Bar
31/5/2015 (DAY5): Thai Secret Cooking School>Foot Message>返香港
而每次去旅行前 我都一定會預早mark低要帶咩衫褲鞋襪袋化妝品林林嬸嬸野
因為我必定帶漏同帶多野 所以list晒出黎 再慢慢篩走d”唔等使”野。
最後 小妹個人比較蠢蠢地 睇完n咁多個blog都分唔到咩係雙條車、嘟嘟車同三輪車
所以每次叫車前一定會問定hostel大概幾錢先 再係上車時問清楚司機幾錢先開車 以免比人兜到亂嗌價都唔知
.
Day 1
搭下晝5點幾機 一上機已經feel到病病地 即刻帶返個口罩咪傳染比人
隔一陣已經訓左 去到清邁已經7點幾
一落機即刻搵的士去hostel 今次book左BB Mantra Hostel 係Pae Gate附近 所以都算易搵
去到check in 間房比我想像中乾淨同okay 望池景
不過可能我地係Chinese 而依間hostel有接待過蝗蟲唔愉快既經歷
佢地係我地房門口痴左張”請保持安靜”定唔知”請保持清潔”既簡體蝗字memo係度
(話知個班Chinese係香港人定蝗蟲 總之唔好丟架比人咁specific地提示喇!)
Check in完成9點幾10點 即刻衝去night market搵食
好鬼盞 有人勁歌熱舞架!
明顯我無理自己開始病 繼續食Pad Thai同กุ้งแช่น้ำปลา架 好鬼惹味呀嘛
食完行左陣 又係入手明信片既moment! 無諗過Chiangmai既postcard係咁靚!
行左陣就返去訓 儲腳骨力 明天去行廟!