【香港兩日一夜好去處】隱世香港渡假屋、酒店連本地遊玩攻略！

放假想留喺香港，但係又唔知去邊度好？咁就要?實小編為大家準備嘅香港兩日一夜好去處推薦，帶大家去一啲隱世香港渡假屋、酒店，等你可以遠離都市壓力同親親大自然，仲教埋你用至抵價錢 book 酒店，慳番啲錢去玩！

1. 銀鑛灣渡假酒店

第一個要同大家介紹嘅香港本地酒店，就係位於梅窩嘅銀鑛灣渡假酒店。梅窩簡樸清靜，有古蹟又有美食，係香港兩日一夜本地遊嘅好去處！酒店對正銀鑛灣沙灘，一出酒店門口就已經係沙灘，鍾意幾點去沙灘玩唔成問題啦！喺沙灘度玩完，相信又攰又想沖身，入住呢間酒店最方便就係可以行幾步就即刻返到酒店沖涼同抖吓，勁方便啊！

唔想去公眾沙灘唔緊要，因為酒店入面都有個游泳池，仲有健身室等嘅設施，可以話係五臟俱全！最特別嘅係有呢一個特大飛行棋玩，可以同朋友一齊玩，重拾童真！玩完水仲可以喺附近租架單車，遊覽成個梅窩，親親大自然！大家玩完水，踩完單車之後，體力消耗得咁上吓就梗係要食嘢填飽個肚啦，呢個時候就可以去酒店附近嘅燒烤場度 BBQ，一路燒烤一路睇日落，過一個悠閒假期！

銀鑛灣渡假酒店
地址：梅窩梅窩銀礦灣 D.D.2 地段 648 (顯示地圖)
星級 | ★★★☆☆
位置 | ★★★☆☆
設施 | ★★★☆☆
環境 | ★★★☆☆
價格 | 查看價格

2. 香港愉景灣酒店

愉景灣呢度比較多外國人居住，所以呢度畀人嘅感覺充滿異國風情，有山景又有海景，係避世嘅好地方！愉景灣仲有好多有特色嘅餐廳，等大家可以盡情咁吃喝玩樂，亦可以享受片刻慢活！

香港愉景灣酒店呢間四星級酒店，客房面積至少有30平方米，而且浴室都好寬敞，仲有特大落地玻璃可以畀你喺房到嘆海景。酒店隔離就係沙灘，可以去游水同曬太陽。講到酒店另一個賣點就梗係要數佢哋嘅 Spa 啦！酒店引入咗亞洲頂尖水療品牌－Spa Botanica，酒店內設有10間海景水療室，住客可以對住個無敵大海景一邊做 Spa 同按摩，絕對係本地遊嘅好去處！

香港愉景灣酒店
地址：愉景灣海澄湖畔路88號 (顯示地圖)
星級 | ★★★★☆
位置 | ★★★★☆
設施 | ★★★★☆
環境 | ★★★★☆
價格 | 查看價格

3. 長洲歐美式渡假旅館

如果要去香港離島玩，相信絕大部分香港人嘅首選都係長洲！事關喺長洲除咗有好多特色美食，好似大魚蛋，糯米糍等等之外，仲有得去沙灘、張保仔洞度玩，吃喝玩樂通通都有齊，週末嚟呢度玩返一兩日就 fit 哂喇！

長洲歐美式渡假旅館地理位置好好，位於長洲嘅中心位置，去邊度都一樣咁方便！而且渡假旅館仲包埋早餐，食完個早餐再去玩就啱哂啦！

長洲歐美式渡假旅館
地址：長洲長洲東灣路12-14號 (顯示地圖)
星級 | ★★★☆☆
位置 | ★★★★☆
設施 | ★★☆☆☆
環境 | ★★★☆☆
價格 | 查看價格

4. 挪亞方舟度假村

挪亞方舟度假村位於馬灣，附近環境清靜，夠哂私隱！喺酒店隔離就係挪亞方舟，亦係全球首個根據聖經內記載一比一大嘅「挪亞方舟」。挪亞方舟係由香港幾個基督教團體一齊營運，入面嘅佈局就以聖經為藍本，入面有好多動物嘅模型，全部都好逼真，亦都係象徵住愛與和平。入面主要分為五個部分，分別係「方舟花園」、「方舟博覽館」、「跨越奇園」、「方舟生命教育館」同「珍愛地球館」，每個都好有教育意義，好啱帶一家大細嚟玩一日！

去完挪亞方舟玩，就可以去沙灘散吓步， 玩到攰就可以返酒店休息，過一個慢悠悠嘅週末！

挪亞方舟度假村
地址：新界馬灣珀欣路33號 (顯示地圖)
星級 | ★★★☆☆
位置 | ★★★☆☆
設施 | ★★★☆☆
環境 | ★★★☆☆
價格 | 查看價格

5. 浪濤軒酒店

南丫島係香港第三大島，島上居民唔算多，大概只有一萬人。如果你想嚟一個遠離都市煩囂嘅兩日一夜本地遊，揀南丫島就冇錯喇！浪濤軒酒店對正洪聖爺泳灘，一出門口就可以睇到個無敵大海景！所有客房都附設露台，可以畀你靜靜哋欣賞海景。除咗可以對住個海睇日出同日落，夜晚仲可以睇埋星星?，真係勁浪漫啊！

酒店仲設有餐廳同酒吧，附近又有遠足徑、單車徑、仲有得玩滑浪風帆，真係留喺度玩足兩日一夜都唔夠喉，令人唔捨得走！

浪濤軒酒店
地址：南丫島榕樹灣洪聖爺泳灘28號 (顯示地圖)
星級 | ★★☆☆☆
位置 | ★★★☆☆
設施 | ★★★☆☆
環境 | ★★★☆☆
價格 | 查看價格

6. 香港數碼港艾美酒店

香港數碼港艾美酒店位於香港島南區，聽落去好似好隔涉咁，但係酒店每日都會有免費接駁車來往中環香港站，好方便㗎！酒店有170間客房同套房、5間酒吧同餐廳。另外，酒店全部範圍都有WiFi網絡覆蓋，無論喺客房入面定係喺游泳池邊，都可以隨時隨地咁上網，掌握最新資訊！

香港數碼港艾美酒店
地址：香港薄扶林數碼港道 100 號 (顯示地圖)
星級 | ★★★★★
位置 | ★★★☆☆
設施 | ★★★★☆
環境 | ★★★☆☆
價格 | 查看價格

7. 大澳文物酒店

大澳係香港嘅特色漁村，保留獨特嘅風土文化，無論你鍾意影相、行山定掃街，呢度都一樣可以滿足到你！而大澳文物酒店係由前警察局改建而成，坐落大澳海邊，房間以復古設計為主調，玩味十足。加上呢度有個以玻璃天幕為特色嘅餐廳，你可以盡情欣賞無邊無際嘅日落景色，帶畀你同愛侶一個火熱浪漫嘅兩日一夜小出走！

大澳文物酒店
地址：香港石仔埗街大嶼山 (顯示地圖)
星級 | ★★★★☆
位置 | ★★☆☆☆
設施 | ★★★☆☆
環境 | ★★★★☆
價格 | 查看價格

文章/圖片來源：Hotels.com Blog，為讀者得到更好的效果，而作出少量修改，原文：【香港兩日一夜好去處】隱世香港渡假屋、酒店連本地遊玩攻略！