如果講起千島湖 好多人應該都只會諗起大陸既千島湖
不過今次我介紹既係網路上人稱「台灣秘景之一」 連好多當地人都唔知道既石碇 – 千島湖
(的確 問過台北朋友 佢話聽都未聽過依個地方..)
由於超級想去依個地方 所以一直係網路上搵方法去 可惜一直提供既方法都係自己揸車去
直到出發前一個星期 我係背包客棧出PO問人 終於有人教左我點去喇!
方法: 捷運新店站→綠12坪林→十三股→行山路45分鐘左右→千島湖
當日我係CHECK INN酒店出發 (過幾日出返篇文介紹CHECK INN! 真心要推介!)
起點: 捷運行天宮站→松江南站→3號新店線→新店
車程: 大概三十分鐘左右
新店站得一個出口 所以唔使驚會出錯
出左站之後 向前望會見到有間FAMILY MART 今日要搭既綠12正正係FAMILY MART隔離
每間車都有時間表寫左係隔離 或者可以參考下依個表
*記得預早少少排隊 一來可能無位坐 二來超!級!準!時!開!車!*
搭左36個站就落車喇 唔好以為好耐 大概廿分鐘度就到 亦都唔使驚唔知到未 站與站之間都會有提示
不過我係淆底豬豬 所以上車前都影底左個站表
落左車之後就向左手邊直行 就會見到去千島湖既入口架喇
旁邊亦有行山路徑圖
依個山路 對我一個人去行黎講 係好驚驚豬的
一來 搵個人睇下都無 除左蟬/虫/雀叫聲/車聲之外 係無人既
二來 係要睇車架! 條路感覺上同入石澳/赤柱差不多 係無咁多彎
*強烈建議 唔好塞住HEADPHONE去行 比車撞親唔好問點解*
三來 我超級怕蝴蝶 但偏偏個度既蝴蝶又多又大隻
行到半路 抵唔住個種靜 開住左SPORTFY黎聽 自己唱下歌仔 行左大概30分鐘到 會見到有好似梯田既茶園
*唔好行入去影相破壞人地個私人茶園 做個有禮貌既旅客!*
轉個彎之後有個LOOKOUT POINT 我已經嘩左一聲
但行入黎時已經不斷行雷 只好咋咋臨影幾張相就繼續行
行多大相10分鐘度 會見到有個牌寫住「千島湖徒步區」大概行多5分鐘就會到架喇!
睇千島湖最靚既地方 係茶寮入面 而我都買左枝冰凍桂花蜜茶(30台幣 好好味 值得一試) 慢慢飲住去睇景
影左一張相 個天已經落勁大雨 但好彩 15分鐘度就停左雨
而我就搵左路人幫我影相
影完相一坐底 心諗: 呀! 點解隻腳咁痕架呢? HOLY SH.. 毛毛虫呀!!!!
後尾再望個欄杆 無錯 個度係有勁多毛毛虫架 所以影相唔好依偎住個欄杆喇!
坐左陣 見無雨 就即刻走人嚕 其實重好想行埋去另一邊 但真心怕行返去個時落大雨 所以決定走人
沿途行返去入口 再過埋落車既巴士站 會見到對面有個「雅香茶莊」 
剛剛好行到去就行雷閃電落大雨
亞母好好人 知道走左班車 叫我入去坐 飲下茶
有個導遊叔叔見我坐左係度 就用台語問亞母我係度做咩
導遊叔叔聽到我既口音就知我係香港人問我點解會搵到千島湖依個地方 又介紹千島湖其他景點比我知 重提我下次搵多幾個一齊黎 唔好再一個人行
(好天真地問叔叔: 鱷魚島真的有鱷魚嗎? 原來只係個島外型似鱷魚而已)
「你吃了中餐了未? 什麼還未? 只吃了全家福蛋糕.. 哎唷! 這是什麼蛋糕那麼的厲害 可以吃了一個就能夠讓你那麼有力氣! 我要推介給別人了!」
「但是你真的很厲害 一個女生自己找車子過來 那麼好力氣走路到千島湖 又懂得找公車沒有迷路 厲害厲害!」
然後 我又重遇一齊落車個兩個台灣女仔 就一齊同叔叔傾計
「你在山上應該看到很多毛毛虫的 那些長大之後就是蝴蝶呀 現在是最多的一個月 下個月就沒有了!」 (我可以有幾好彩..!)
「冬天來千島湖你可以看到很多雪的 超美的 秋天來 入口處的樹都會變成紅色的 好像楓葉一樣」
「而且我們那邊唷 因為是保育區來的 所以會看到很多動物 你看 這個是叫藍鳥 牠們每一次也是兩隻一起的!」
(Google話我知 佢地本名叫藍鵲 係非常稀少既鳥類)
「還有呀 我的腳呀 也是給穿山甲撞成這樣的! 你有沒有看過? 沒有看過真的 我給你看..」(佢隻腳係打左舊巨型石膏架..)
正當我想叫佢地影相之時 就有車嚕 TIME TO SAY GOODBYE 而我既獨遊千島湖之旅亦暫告一段落
後記
台灣巴士好有愛 一直提你搭車要望下景唔好玩電話/IPAD 因為好傷眼 又或者 因為路況隨時有變 會叫緊扼扶手
行完山後既感覺係 你唔會明點解依班人可以自律到咁無譜 雖然山頭上一個垃圾筒都無 但一粒垃圾我都見唔到!
相比起香港 總有一個劉江華係左近 但偏偏通山都係垃圾 SO SAD:(
*強烈建議:
1. 早上去千島湖 因為叔叔話台灣天氣變幻莫測 早上天氣多數好天 但晏就就會無啦啦落雨
2. 怕餓帶定野食 亦都要去定廁所 沿途麥都無
3. 回程唔想行路 可以去定「雅香茶莊」BOOK車仔 (不過其實沿途都會見到佢地 隨時叫停都得)
最後一提 請愛護環境 自己垃圾自己清 帶走所有膠樽垃圾!
