[辭職去旅行] CK遊布拉格 – 超伏HOSTEL

是咁的, 中咗巨伏當然要第一時間同大家開心share:
響Prague book 咗間hostel, check-in 時正正常常, 老闆仲由10 beds dorm upgrade咗我去 5 beds dorm 添!!
一入房, 唔… 好似雜物房咁嘅? 唔緊要, 最緊要平!!! €9/晚想有幾靚? 一分錢一分貨, 都係瞓覺啫!!!

放低backpack, 正想出去嘅時候, 老闆狀甚激動地話好歡迎我嚟到布拉格, 住佢間hostel, 仲拎咗2隻 shot glasses 出嚟, 斟咗一shot酒俾我, 當時我好唔想飲, 怕有古怪, 但佢盛意拳拳咁, 我又睇住佢斟, 一shot應該ok 嘅… 點知我一飲, 嘩!!! 呢枝咩嚟架!!!! 起碼40度!!! 一shot酒我竟然要分3啖飲, 飲完見佢想再斟, 我即刻多謝夾盛惠, 話要出去觀光然後即撇!!!

夜晚返到hostel, 一入門口已經覺得唔對路… 點解有班阿叔坐響度睇波? 一陣汗味煙味酒臭味攻埋嚟, 究竟我有冇入錯門口? 當我發現呢班阿叔見到我時嘅驚訝程度同我不相上下, 我就明白 check-in 時老闆點解咁激動… 我點一點頭當打招呼, 然後扮哂鎮定咁行入房跟手即刻鎖埋門, 好在我同佢地唔係同房!!!!! 返入房認真睇下間房, 發現牆角好多塵同蜘蛛網, 咦… 仲有隻細蜘蛛死咗響我張床度添… 唔緊要, 我有私家睡袋!!

儲氣儲咗一輪, 我鼓起勇氣行出房去shower room沖涼, 老實講就算呢個時候冇熱水我都唔覺得出奇… 好在呢度起碼係有熱水嘅!!! 沖完涼返到入房, 突然醒起上年同小姐去巴黎, 佢話我揀果啲hostel好似<激戰>入面張家輝去避債果啲咁, 最終佢都係揀住酒店… 但而家, 明明張家輝去避債都只係遇到兩母女, 點解我會遇到一班麻甩佬??? 講真幾年前響 Adelaide 曾經住過好似鬼屋咁嘅hostel, 都未有而家咁驚青…..

咁伏嘅hostel, 有咩開心得過住一晚? 就係住兩晚!!! (待續)